काठमाडौँ, २८ असोज ,, नेपाली काँग्रेस केन्द्रीय कार्यसमितिको आकस्मिक बैठकले पार्टीका पूर्व केन्द्रीय सदस्य एवं पूर्वमन्त्री चक्रप्रसाद बाँस्तोलाको निधनमा आज शोक प्रस्ताव पारित गरेको छ ।
पार्टी केन्द्रीय कार्यालय सानेपामा आज अपराह्न बसेको बैठकले उहाँको निधनले बौद्धिक, निष्कलङ्क, प्रखर र क्रान्तिकारी नेतालाई गुमाएको बैठकपछि जारी विज्ञप्तिमा उल्लेख छ । नेता बाँस्तोलाप्रति उच्च सम्मान प्रकट गर्दै पार्टीले तीन दिनसम्म पार्टीको केन्द्रीय कार्यालय र मातहतका सबै कार्यालयमा झण्डा आधा झुकाउने निर्णय गरेको छ ।
यही असोज २९ गते केन्द्रीय कार्यालय र मातहतका सबै कार्यालय बन्द गर्ने काङ्ग्रेसले जनाएको छ । स्वर्गारोहणको १३ औँ दिनसम्म केन्द्रीय कार्यालय र सबै जिल्ला कार्यालयमा श्रद्धाञ्जलि पुस्तिका राख्ने र १३ औँ दिन शोकसभा गर्ने निर्णय काङ्ग्रेसले गरेको छ ।
नेता बाँस्तोलाको आइतबार राति ललितपुर खुमलटारस्थित आफ्नै निवासमा उपचारका क्रममा निधन भएको थियो । विसं २०६९ पुस १४ गते मोरङको एक सार्वजनिक कार्यक्रममा सहभागी भएका बेला मस्तिष्काघात भई उहाँ अचेत हुनुभएको थियो । त्यसैबेलादेखि नेता बास्तोलाको उपचार भइरहेको थियो ।
बनारस हिन्दू विश्वविद्यालयमा पढ्दैदेखि राजनीति शुरु गर्नुभएका बाँस्तोला प्रजातान्त्रिक समाजवादी युवा लिगको स्थापनादेखि काङ्ग्रेस राजनीतिमा सक्रिय हुनुभएको हो । काँग्रेसको नेतृत्वमा भएका हरेक आन्दोलनमा उहाँले अग्रणी भूमिका निर्वाह गर्नुभयो ।
विसं २०२५ मा बिपी कोइराला निर्वासित भई भारत जानुभएपछि बाँस्तोलाले सशस्त्र सङ्घर्षको तयारी गर्नुभएको थियो । विसं २०६२ मा सात राजनीतिक दल र तत्कालीन नेकपा माओवादीबीच १२ बुँदे समझदारीको पृष्ठभूमि तयार गर्नमा समेत उहाँको महत्वपूर्ण भूमिका थियो ।
बाँस्तोलाले पर्यटन तथा नागरिक उड्डयन, गृह, परराष्ट्र, कृषि मन्त्रालयको कार्यभार सम्हाल्नुभएको थियो । उहाँले भारतका लागि नेपालको राजदूत रहेर समेत काम गर्नुभयो । उहाँको जन्म विसं २००३ मंसिर ११ गते भएको थियो । बाँस्तोलाको पार्थिव शरीर अन्तिम श्रद्धाञ्जलिका लागि अहिले पार्टी केन्द्रीय कार्यालय सानेपामा राखिएको छ । आजै पशुपति आर्यघाटमा उहाँको अन्त्येष्टि गरिने काँग्रेसले जनाएको छ ।
–––
तपाईंको प्रतिकृयाहरू