अदालतमा नेपाली भाषा प्रष्ट बनाऔँ’

बलेवा, १८ असोज,,   बागलुङ अदालतमा प्रयोग हुने भाषालाई जटिल र क्लिष्ट बनाइयो भने भविष्यसम्म रहने नजीरमा समस्या हुन्छ । फैसला हुँदा हारजीत हुनेले पनि आफू के कारणले हारेको वा जितेको भन्ने समेत प्रष्ट नहुने खतरा रहन्छ । अदालतमा यस्ता उदाहरण धेरै भएका छन् । त्यसैले सर्वोच्च अदालतबाटै भाषामा शुद्धता ल्याउने अभियान थालेको छ ।

अदालतबाट जारी हुने आदेश र फैसलामा विशेष यस्ता भाषाको महत्व रहन्छ । मुद्दा उठान भएदेखि फैसलासम्म पुग्दाका मिसिलमा स्पष्ट भाषा नभएको खण्डमा भविष्यसम्म त्यसको असर पर्छ भनेर सर्वोच्च अदालतको सम्पादन तथा प्रकाशन समितिले सबै जिल्ला तथा उच्च अदालत तहका कर्मचारीलाई भाषाको शुद्धीकरणका लागि ‘कानूनी नेपाली भाषा प्रशिक्षण’ सञ्चालन गरेको हो ।

त्यसअघि न्यायाधीशका लागि पनि अभिमुखीकरण कार्यक्रम राखिसकेको समितिले कर्मचारीलाई तालीम दिएको समितिका सम्पादक रामप्रसाद पौडेलले बताउनुभयो । बागलुङमा पनि जिल्ला र उच्च अदालतका कर्मचारीका लागि तालीम सञ्चालन भएको छ । उक्त तालीममा दुवै अदालतका गरी ३० भन्दा बढी कर्मचारीको सहभागिता छ ।
तालीम उद्घाटनका अवसरमा उच्च अदालत पोखरा बागलुङ इजलासका मुख्य न्यायाधीश शेषराज शिवाकोटीले भाषाको शुद्धीकरण नभए देशको समृद्धि पनि असम्भव हुने बताउनुभयो । उहाँले अन्तरराष्ट्रिय तहमा पनि त्यो देशको भाषा कति समृद्ध छ भनेर अध्ययन गरेपछि अरु समृद्धिको आँकलन गर्ने चलन रहेको बताउनुभयो ।

उहाँले वर्षाैंँअघि बेलायती उपनिवेशको अन्त्य भए पनि हाम्रो भाषामा त्यसको प्रभाव बढिरहेको बताउनुभयो । अङ्ग्रेजी अनिवार्य चाहिने भन्ने मान्यताबाट मुक्त भएर नेपाली भाषालाई नै समृद्ध बनाउन सक्दा विश्वका अन्य देशले पनि नेपाली भाषा पढ्न थाल्ने उहाँले बताउनुभयो । न्यायाधीशको अन्तर्राष्ट्रिय सम्मेलन नेपालमा हुँदा धेरै देशका न्यायाधीशले नेपाली भाषामा मन्तव्य दिएको अनुभव सँगालेको खतिवडाले प्रस्तुत गर्नुभएको थियो ।

कार्यक्रममा जिल्ला न्यायाधीश प्रकाशप्रसाद पण्डितले अदालतका लिखत सार्वजनिक दस्तावेज भएको छ भन्दै ती लिखत बिग्रनु एक कर्मचारीको कमजोरी मात्र देखिने नभई राज्यको सम्पत्तिसमेत बिग्रने बताउनुभयो । सहप्राध्यापक रामचन्द्र फुयाँल र सर्वोच्च अदालतका सहरजिष्ट्रार भद्रकलि पौडेलले तालीमको सहजीकरण गर्नुभएको छ ।
–––