संघीयता असफल भए मुलुक असफलः मुख्यमन्त्री राउत

पर्सा, ३ असार (रासस) ः प्रदेश नं २ का मुख्यमन्त्री लालबाबु राउतले नेपाल सरकारले हालै सार्वजनिक गरेको बजेट संघीयता कार्यान्वयनप्रति उदासीन रहेको आरोप लगाउनु भएको छ ।

एभिन्युज टेलिभिजनले आज वीरगन्जमा आयोजना गरेको ‘संघीय बजेट’ विषयको अन्तरक्रिया कार्यक्रमलाई सम्बोधन गर्दै उहाँले बजेट संघलाई बलियो बनाउने हुनुपर्नेमा बजेटले उल्टै संघलाई कमजोर बनाउने काम गरेको आरोप लगाउनुभयो ।

उहाँले आव २०७५÷०७६ को बजेटमा कुनै प्रदेशलाई बढी र कुनै प्रदेशलाई थोरै रकम विनियोजित गरीे प्रदेशप्रदेश बीच विवाद हुने अवस्था सिर्जना गरेको दाबी गर्नुभयो । उहाँले संघीयतालाई सफल बनाउनु सबैको दायित्व भएको र संघीयता असफल भए मुलुक नै असफल हुने भएकाले संघलाई बलियो बनाउँदै राष्ट्रलाई विकसित र समृद्ध बनाउनेतर्फ केन्द्र सरकारले आफ्ना क्रियाकलाप केन्द्रित गर्नुपर्ने बताउनुभयो ।

चौवन्न लाखभन्दा बढी जनसंख्या रहेको प्रदेश नं २ मानव सूचकाङ्कमा अन्य प्रदेशको तुलनामा अन्तिम दुईमा रहेकाले केन्द्र सरकारले बजेट विनियोजित गर्दा २ नं प्रदेशमा पूर्वाधार विकासका लागि बढी बजेट दिनुपर्ने उहाँको भनाई थियो । उहाँले पछि परेका प्रदेशलाई थोरै र अघि रहेका प्रदेशलाई धेरै बजेट विनियोजित गर्नु गलत रहेको टिप्पणी गर्नुभयो ।

मुख्यमन्त्री राउतले प्रदेश नं २ समृद्ध र विकसित नभए देश नै विकसित हुन नसक्ने दाबी गर्दै यस प्रदेशको पूर्वाधार विकासप्रति गम्भीर हुन केन्द्र सरकारलाई आग्रह गर्नुभयो ।

अन्तरक्रियामा वीरगन्ज उद्योग वाणिज्य संघका अध्यक्ष ओमप्रकाश शर्मा, उद्योगी जगदीश अग्रवाल, राष्ट्रिय जनता पार्टी (राजपा) का सहमहासचिव नजामुद्दीन समानी, राजपाकी नेत्री रम्भा झा तथा उद्योगी, व्यापारीले बजेटका विभिन्न पक्षमाथि चर्चा गर्नुभएको थियो ।
–––