वैकल्पिक राजमार्ग बनाउने तयारी ः उपाध्यक्ष डा कँडेल

धादिङ, १५ असोज  राष्ट्रिय योजना आयोगका उपाध्यक्ष डा पुष्प कँडेलले सीपाइला, लामीडाँडा, गल्छी, कल्लेरी हुँदै कुम्पुर सलाङबाट बेनी दोभानको सडक निर्माण गरी वैकल्पिक राजमार्ग बनाउन लागि परेको बताउनुभएको छ । धादिङबेँसीमा प्रेस सङ्गठनले आयोजना गरेको पत्रकार भेटघाट कार्यक्रममा उहाँले काठमाडौँ उपत्यका भित्रिने नाका नागढुङ्गा नौबिसे सडकमा जाम भइरहने र अबका दिनमा यही सडकले सवारी आवागमन धान्न नसक्ने भएकाले वैकल्पिक राजमार्ग बनाउनुपर्ने आवश्यकता आएको बताउनुभयो । काठमाडौँमा ५० लाख मानिस बस्छन् । चाडबाडको बेला उनीहरु घर जाने र फर्कने ठूलो सङ्ख्या एकै पटक ओहोरदोहोर हुने गरेको छ । यस अवस्थामा वैकल्पिक मार्ग आवश्यक भइरहेको सन्दर्भमा काठमाडौँको चाप कम गर्न र लामीडाँडादेखि गल्छी, कल्लेरी, कुम्पुर, सलाङ हुँदै बेनिदोभानसम्म त्रिशूली उपत्यकाको रुपमा विकास हुने र वैकल्पिक राजमार्ग बनाउन सकिने भएकाले यो योजना दशैँपछि अध्ययन भई छिट्टै काम शुरु हुने योजना रहेको उपाध्यक्ष डा कँडेलको भनाइ छ । उहाँले धुनीबेँसी नगरपालिका, थाक्रे, गल्छी, सिद्धलेक गाउँपालिकाले यो योनामा स्थानीय सरकारले सघाएमा छिट्टै निर्माण सकिने उल्लेख गर्दै यस क्षेत्रको धेरै स्थानमा सडक बनिसकेको छ । यसलाई चौडा बनाउन र कालोपत्र गर्नसके नदी किनारको नयाँ शहर र सभ्यता हुनेछ भन्नुभयो । उपाध्यक्ष डा कँडेलले बूढी गण्डकी जलविद्युत् योजना छिटो निर्माण काम शुरु गर्न मुआब्जा वितरणको काम तत्काल गर्नुपर्नेमा पनि जोड दिनुभयो ।