ह्विलचियरले ल्यायो अपाङ्गताको मुहारमा खुशी

तनहुँको रिसिङ गाउँपालिका–७ का भक्तबहादुर आले छ वर्षदेखि विनासहारा हिँड्डुल गर्न सक्नुहुन्न । वैदेशिक रोजगारीको सिलसिलामा मलेशियामा रहँदा दुर्घटनामा परेर उहाँ अपाङ्ग हुनुभएको थियो । त्यसयता उहाँ ह्विलचियरको सहाराले हिँड्डुल गर्नुहुन्छ ।

मलेशियाबाट ल्याएको ह्विलचियर पुरानो भएपछि उहाँलाई केही असहज अवस्था उत्पन्न भएको थियो । रिसेड तनहुँले राष्ट्रिय अपाङ्ग पुनःस्थापना समाजको सहयोगमा नयाँ ह्विलचियर प्रदान गरेपछि उहाँमा खुशी छाएको छ ।

“बिग्रिएको ह्विलचियर मर्मत गर्दै दुई वर्षदेखि प्रयोग गर्दै आएको थिएँ”, उहाँले भन्नुभयो, “नयाँ ह्विलचियर पाएपछि खुशी लागेको छ ।” पुरानो ह्विलचियरमा हिँड्दा समस्या हुने गरेको र अब नयाँ ह्विलचियर पाएपछि सहज हुने उहाँले बताउनुभयो ।

व्यास नगरपालिका–६ का प्रतिमा श्रेष्ठसमेत नयाँ ह्विलचियर पाएपछि खुशी हुनुहुन्छ । पुरानो ह्विलचियर बिग्रिएर हिँड्डुल गर्न समस्या भएपछि उहाँलाई नयाँ ह्विलचियरको आवश्यकता थियो । “पुरानो ह्विलचियरमा हिँड्दा कहिलेकाहीँ लड्ने समस्या थियो, नयाँ ह्विलचियरको खोजीमा थिएँ”, उहाँले भन्नुभयो, “रिसेडले नयाँ ह्विलचियर प्रदान गरेपछि खुशी लागेको छ ।”

उहाँ सोही वडाको जनजुक्त शाही माध्यमिक विद्यालयमा कक्षा ८ मा अध्ययनरत हुनुहुन्छ । उहाँले भन्नुभयो, “नयाँ ह्विलचियरमा विद्यालय जान÷आउन अब सजिलो हुने भयो ।”

भक्तबहादुर र प्रतिमा मात्र होइन अन्य १८ अपाङ्गता भएका व्यक्तिसमेत ह्विलचियर पाएपछि खुशी हुनुहुन्छ । बन्दीपुर गाउँपालिका–२ का प्रमिला कुँवर जोगीले निःशुल्क ह्विलचियर पाएपछि सजिलो भएको बताउनुभयो । उहाँले भन्नुभयो, “पैसा तिरेर खरीद गर्नुपरेको भए समस्या थियो । निःशुल्क ह्विलचियर उपलब्ध गराएर आयोजकले गुन लगाएको छ ।”

रिसेड तनहुँले राष्ट्रिय अपाङ्ग पुनःस्थापना समाजको सहयोगमा २० जनालाई ह्विलचियर वितरण गरेको छ । करीब रु सात लाख मूल्य बराबरको ह्विलचियर वितरण गरिएको रिसेड तनहुँका अध्यक्ष पदम परियारले जानकारी दिनुभयो । ह्विलचियर पाउनेमा व्यास नगरपालिका, रिसिङ गाउँपालिका, म्याग्दे गाउँपालिका, शुक्लागण्डकी नगरपालिका, आँबुखैरेनी गाउँपालिका र बन्दीपुर गाउँपालिकाका अपाङ्गता भएका व्यक्ति रहेको रिसेडका महासचिव दामोदर रेग्मीले जानकारी दिनुभयो ।

राष्ट्रिय अपाङ्ग महासङ्घ नेपालका केन्द्रीय सदस्य सुगम भट्टराईका अनुसार समाजले देशका विभिन्न ठाउँमा पुगेर अपाङ्गता भएका व्यक्तिलाई ह्विलचियर प्रदान गर्ने गरेको छ । नेपालमा वार्षिक तीन हजार ५०० भन्दा बढी ह्विलचियरको माग भए पनि दुई हजारलाई मात्रै ह्विलचियर वितरण गर्न सकिएको उहाँले जानकारी दिनुभयो । समाजले सन् २००६ देखि नेपालमा १५ हजारभन्दा बढी ह्विलचियर वितरण गरिसकेको छ ।

राष्ट्रिय अपाङ्ग पुनःस्थापना समाजका प्राविधिक सुनिता रिजालले नेपालमा तीन प्रकारको ह्विलचियर वितरण भइरहेको छ । उचित स्याहारसुसार गरेको खण्डमा ह्विलचियर तीन वर्षसम्म टिक्छ । समाजले घिरिङ गाउँपालिकामा सातलाई र भिमाद नगरपालिकामा १० लाई ह्विलचियर वितरण गरिसकेको छ ।

पत्रकारमाथि दुव्र्यवहार

कान्तिपुर दैनिकका संवाददाता प्रताप रानालाई समाचार सङ्कलनको क्रममा तनहुँको भिमाद नगरपालिका–५ का सचिव रमेशप्रकाश बरालले सोमबार दुव्र्यवहार गरेका छन् । प्राकृतिक स्रोतसाधनमाथि भएको दोहनको समाचार सङ्कलनको सन्दर्भमा वडा कार्यालय पुगेका पत्रकार रानामाथि वडासचिव बरालले अभद्र व्यवहार गरेका हुन् ।

पत्रकारिताका माध्यमबाट आमजनतालाई सुसूचित पार्ने संवैधानिक हकअन्तर्गत सूचना माग्न कार्यालय पुगेको बेला ‘पत्रकारलाई सूचना दिन्न, जे गर्छौ गर’ भन्दै बरालले आफूमाथि दुव्र्यवहार गरेको रानाले बताउनुभयो । उहाँले भन्नुभयो, “समाचार सङ्कलनको सिलसिलामा वडा कार्यालयमा जाँदा वडासचिव बरालले आक्रमक शैलीमा ममाथि दुव्र्यवहार गर्नुभयो ।”

नेपाल पत्रकार महासङ्घ तनहुँ शाखाले सोमबार नै प्रेस विज्ञप्ति प्रकाशित गरी शाखाका कोषाध्यक्षसमेत रहनुभएका रानाप्रति भएको दुव्र्यवहारको निन्दा गरेको छ । शाखाका अध्यक्ष ओमकार आचार्य र सचिव उज्ज्वल पौडेलले संयुक्तरूपमा प्रेस विज्ञप्ति प्रकाशित गरी ‘पत्रकारलाई सूचना दिन्न, जे गर्छौ गर’ भन्ने बरालको अभिव्यक्ति निन्दनीय रहेको जनाउनुभएको छ ।

“राज्यको चौथो अङ्गका रुपमा हेरिने पत्रकारिता क्षेत्रलाई नै अपमानित गर्ने ढङ्गले वडासचिव बरालले गरेका अपमानजनक दुव्र्यवहारप्रति महासङ्घ खेद प्रकट गर्दछ”, विज्ञप्तिमा भनिएको छ । विज्ञप्तिमा सूचनाको हकको प्रत्याभूति र पूर्ण प्रेस तथा अभिव्यक्ति स्वतन्त्रताको सम्मान गर्दै निर्वाधरूपमा सुरक्षित ढङ्गले पत्रकारिता गर्ने वातावरण निर्माण गर्न माग गर्दै पत्रकारमाथि दुव्र्यवहार गर्ने वडासचिवमाथि कारवाहीको माग गरिएको छ ।