कपडा सहित सिन्धुलीका एक व्यापारी कपिलवस्तुमा पक्राउ ।।

सनिउल्ला धोबी, कपिलवस्तु चैत २७

कृष्णनगर प्रहरीले भन्सार छलीका ठूलो परिमाणको कपडा बरामद गरेको छ ।
साथै कपडा व्यापारी समेत पक्राउ परेका छन् । अर्काको नामको पुरानो
भ्याटबिलमा मिति सच्याई भारतबाट अबैध रुपमा भन्सार छली गरी कपडा नेपाल
भित्राएको भन्दै विशेष सुराकीका आधारमा प्रहरीले कपडासहित सिन्धुलीका
एकजनालाई पक्राउ गरेको हो ।

पक्राउ पर्नेमा मजुवा गाउँपालिका ५, गैरीगाउँ सिन्धुलीका ४१ वर्षे सुभाष
दाहाल रहेका छन् । ज्योति सप्लायर्सको भ्याटबिल प्रयोग गरी कपडा तस्करी
गरेको भन्दै दाहाललाई अनुसन्धानका लागि पक्राउ गरेको इलाका प्रहरी कार्यालय
कृष्णनगरका प्रहरी निरीक्षक सुभाष कुमार गैरेले जानकारी दिनुभयो ।

गत आइतबार साँझ पौने ७ बजेको समयमा कृष्णनगरबाट चन्द्रौटातर्फ आउँदै
गरेको लु १ ख ८६९२ नम्बरको बसमा चोरी तस्करी गरी ल्याउँदै गर्दा विशेष
सुराकीको आधारमा चेकजाँच गर्दा इलाका प्रहरी कार्यालय कृष्णनगरको टोलीले
पक्राउ गरेको थियो । ज्योति सप्लायर्सको नाममा भ्याटबिल नम्बर ६०६३५१४०५ मा
पुरानो मिति सच्याई ५८५ थान लेडिज सुट भारतीय बजारबाट नेपाल भित्राएको
प्रहरी निरीक्षक सुभाष कुमार गैरेले जानकारी दिनुभयो ।

मिति सच्याइएको पाइएपछि ज्योति सप्लायर्सका प्रोप्राइटर जगदेव प्रसाद मिश्रलाई
ल्याई सोधपुछ गर्दा चैत २२ गते भ्याटबिल काटी सोही दिन कपडा डेलिभरी
भइसकेको बयान दिएको प्रहरी निरीक्षक गैरेले बताउनुभयो । प्रहरीलाई बयान
दिंदै ज्योति सप्लायर्सका मिश्रले आफ्नो फर्मको भ्याटबिलको गलत प्रयोग
गरी कसैले भन्सार छल्ने कार्य गरेको भनी कारबाहीको मागसहित लिखित कागज
गरेका थिए । अर्काको फर्मको भ्याटबिल दुरुपयोग गरी कपडा चोरी तस्करी
गरेको भन्दै थप अनुसन्धानका लागि सोमबार राजश्व अनुसन्धान पश्चिमाञ्चल क्षेत्रीय
कार्यालय बुटवल पठाइएको प्रहरी निरीक्षक गैरेले जानकारी दिनुभयो